Drents

Gemiente Coevern: een gemiente waor stad en plattelaand bij mekaar komt De gemiente Coevern lig in Zuudoost-Drenthe en zit wat grootte angiet tussen schöttel en taofellaken in. Der is ruumte zat, want der woont roem 36.000 mèensen op 30.000 bunder.

De inwoners van Coevern woont in de stad Coevern en in 23 darpen en darpies: Steenwingsmoer, Neie Krim, Zweel, Aalden, Bennenveld, Möppen, Wisp, Wisperbrug, Slien, Noord-Slien, Erm, ’t Haantie, De Kiel, Schonerd, Hesseln, Gies, Giesbrogge, Zwindern, Daolen, Daolerveen, Daolerpeel, Stieltjeskenaol en Wachtum.

Je kunt goed in Coevern kommen; dat kan over de weg, over ’t water en met de trein. De belangriekste wegen der naortoe bint de N34 en de A37. Aj met de trein van Zwolle hen Emmen gaot, koj in de gemiente an twie stations van de NS langs: Coevern en Daolen. Wieder is Coevern ansleuten op de Duutse spoorwegen van de Bentheimer Eisenbahn. Zo kuj met de trein hiel Europa in.

Aj oet het zuden komt, kuj deur het kenaol Coevern-Almelo in de stad kommen. Deur dat kenaol kunt vandaag de dag schepen van 600 tun. Van het noorden oet kunt deur het Stieltjeskenaol zölfs schepen van 800 tun hen Coevern. Middenin de stad is een neimoodse haven veur toeristen op deurreis.

De gemiente Coevern wil niet stilstaon blieven. Dat kuj bijveurbeeld zien an twie belangrieke prejecten die begund bint, namelijk “Coevorden beweegt” en “Buitengewoon Platteland”.

Coevorden Beweegt

De gemiente Coevern is under de naam “Coevorden Beweegt” begund met een groot stadsverneiingspreject. Stedenbouwkundige Syam Khandekar prissenteerde het zogenuumde “Wensbeeld”: op zu’n twintig plaotsen wordt de stad vanneis inricht en dat allemaol met de bedoeling um van Coevern weer een slim livvendige stad te maken. Het volk van Coevern wordt hier nauw bij betrökken: zie vertelden dat water, geschiedenis en gezelligheid het belangriekste in de neie binnenstad weden moet. In 2005 stelde de gemienteraod het “Masterplan” veur de oetvoering vast. Het risseltaot: het hiele gebied Markt en Haven wordt vanneis inricht. Der komt een nei gemientehoes an de Markt, die met een ‘loper’ verbunden wordt met het Kasteel. Op verscheiden plaotsen komt neibouw, bijveurbeeld op de plek van de brandweerkazerne an de Haven. Der wordt ok neie bruggen anlegd. Ok de Weeshuisweide kreg hielemaol een neie ankiek en de Weeshuysstraat en het Weeshuisplein kriegt dezölfde stijl. De zuudkaant van de stad herken ie dommiet zowat niet weer. Der komt twie neie havens, de Bentheimerbrug wordt verneid en kreg twie neie gebouwen an de kop. Dat, dit stuk van de stad wordt een waterpoort.

Aj meer over het preject weten wilt, kuj kieken op de webstee www.coevordenbeweegt.nl.

Buitengewoon Platteland

Met het preject “Buitengewoon Platteland” wil wij het plattelaand ok in de toekomst mooi en vol levenskracht holden en daorbij moet het behold van de plattelaandscultuur en het anpeerdjen van verneiing haand in haand gaon. Veural umdat het plattelaand veraandert. Aj niet oetkiekt komt de leefbaarheid in de darpen en darpies in gevaor. De bevolking vergriest, veurzienings gaot vort, mèensen kunt makkelker reizen en het verieningsleven bluit niet meer zo. Samen met het volk op het plattelaand wil de gemiente kieken welke kaant aw op moet. Daorum is der aal protend met mekaar een “kadernotitie” maakt. Hier stiet in waor aw de kommende tien tot vieftien jaor met het plattelaand hen wilt. Ok dit preject hef een eigen webstee: www.buitengewoonplatteland.nl

Grenzeloos goed wonen

In de gemiente Coevern kuj gloepends schier wonen. Der komt verscheiden mooie woonwieken an. De mieste hoezen wordt bouwd in het plan “Ossehaar” an de raand van de stad. In Ossehaar komt 550 woningen. Het plan wordt in gedielten oetvoerd. In ’t eerste diel wordt der umdebij 240 hoezen bouwd, zowal halfvrijstaond as vrijstaond. In de stad Coevern kan, aans as in de boetendarpen, elkenien wonen gaon.

Het oetbreidingsplan “Klinkenvier” in Coevern is een “wonen-aan-het-waterproject”, dat in totaol roem 60 bunder groot worden zal. Der komt zestig luxe woningen.Aj meer weten wilt over bouwkavels kuj contact opnimmen met de peblieksofdieling, loket Bouwen en Wonen, (0524) 598121/124.

In de boetendarpen bint niet veul meugelijkheden um hoezen te bouwen. De bouwkavels wordt stappie veur stappie oetgeven; eigen inwoners kriegt veurrang wat dit angiet.

Grenzeloos goed recreëren

In de gemiente Coevern kuj geweldig goed vekaansie holden. Der is in de gemiente genog te beleven; niet allén aj maor ien daggie op bezuuk komt, maor ok aj der langer blieft.Van alle toeristische overnachtingen in hiel Drenthe wordt een kwart in oeze gemiente deurbracht (1,6 miljoen in ’t jaor).

Toeristen slaopt in hotels en op campings, maor de miesten verblieft in de bungalowparken: Center Parcs “De Huttenheugte” B.V. in Daolen, Landal Green Parcs “Aelderholt” in Aalden en Bungalowpark “Ermerzand” in Erm. De VVV’s in Coevern, Daolen, Gies, Schonerd, Slien en Zweel helpt je geern aj een goed dak boven de kop zuukt.

In de umgeving van Coevern vin ie rust, ruumte, een mooie natuur, een prachtig landschap, rieke geschiedenis, veul verschillende veurzienings en geweldig goeie meugelijkheden um te varen en te fietsen.

In de stad Coevern stiet het ienige kasteel van Drenthe. Het kasteel weur al veur 1200 bouwd. Het kasteel van vandaag de dag is restaureerd en is een diel van het gemientehoes. In het Kasteel kuj trouwen en der wordt allerhaande bijienkomsten en feesten holden.Aj met je boot in de haven van Coevern anlegt, bi’j metien in de olde vestingstad en dat mag best uniek nuumd worden.Wieder is in het Arsenaal in Coevern het gemientelijk museum “Drenthe’s Veste’. Hier is ok de tentoonstellingsruumte van de “Culturele Commissie Coevorden”.

Het darp Daolen is deur zien landelijke karakter arg gewild as forensenplaots. Veural in de zommer komt er veul toeristen. Deurdat Center Parcs “De Huttenheugte” der is, bint in Daolen de mieste overnachtingen van toeristen. Met umdebij 300 mèensen is Center Parcs ok ien van de grotere warkgevers in de gemiente.In Daolen bint een stuk of wat dinger van ambachtelijke aard het bekieken weerd, zoas bijveurbeeld een pottenbakkerij en twie meulens.

Hesseln en Gies bint biezunder, umdat ze zu’n mooi en ofwisselnd landschap hebt met veul bos, veld en vennen. De twie natuurrisservaten “De Hooge Stoep” in Gies en “De Klencke” in Hesseln bint beslist een bezuk weerd. In dizze umgeving staot boetendes prachtig mooie, goed underholden Saksische boerderijen. Van een bezuuk an galerie en beeldentuun “Dehullu” in Gies zuj ok beslist gien spiet kriegen.

Het darp Schonerd is een beste plek veur vekaansie en vrije tied worden. In Schonerd bint het openluchtmuseum “Ellert en Brammert” en een stuk of wat hunebedden, waorunder “De Papeloze Kerk” het bekieken weerd. As hunebedden en grafheuvels je interesse hebt of aj der meer over weten wilt, bi’j op de juuste stek.

Het darp Slien is ien van de miest authentieke brinkdarpen in Drenthe. Veul toeristen vindt de sfeer, de rust en de schitterende umgeving van het darp alderbarstend plezerig. In Slien bint de NH Kerk (oet de 15e ieuw) en het vroggere gemientehoes de muite van het bekieken weerd.

De natuurgebieden um Zweel hen en het plezerige darp bint belangriek veur daggiesmèensen en veur lu die der langer blieven wilt. De NH Kerk in Zweel oet de 13e ieuw en de smidse van 1896, die nog alle dagen gebroekt wordt, bint mooi um ies hen te gaon.

Veurzienings veur oet de wiede umgeving bint under andern de kunstskibaan in Wisperbrug, de openbare negenholes golfbaan van Landal Green Parcs en de achttienholes baan van golfveriening “De Gelpenberg”, allebeide in Aalden en de waterskibaan op het recreatiepark “Ermerstrand” in Erm.

Warving van neie bedrieven

De warving van neie bedrieven wordt veural deur de gemiente zölf daon, in samenwarking met de NV NOM / DBL in Grunning. Aj meer weten wilt, kuj terecht bij de ofdieling economische zaken van de gemiente, tillefoon (0524) 598123.Der bint hiel verschillende bedrieven in Coevern. Veural metaal- en elektrotechnische febrieken en vervoersbedrieven bint der hiel wat. Wieder bint der veul undernemingen, die nauw verbunden bint met de eulie- en gaswinning. De bedrieven hebt een samenwarkingsverband: “Industriële Vereniging Coevorden”, Postbus 220, 7740 AE Coevern.

Veurzienings

In Coevern bint hiel wat verschillende schoelen, van VBO tot Gymnasium. Ok bint der een hiele koppel sportverienings. Der bint veul sporthallen en sportvelden, der bint drie boetenzwembaden, en een overdekt zwembad en verscheiden waterplassen veur toeristen zoas “De Huttenheugte” in Daolen, het “Ermerstrand” in Erm en de “Kibbelkoele” bij Slien.

Aj kiekt naor de volksgezondheid is der in Coevern under andern het streekziekenhoes “Coevorden-Hardenberg”. Boetendes bint der verscheiden woon-zörgcentrums in de wieken en darpen.