Drents

Gemiente Coevern: een gemiente waor stad en plattelaand bij mekaar komt. De gemiente Coevern lig in Zuudoost-Drenthe en zit wat grootte angiet tussen schöttel en taofellaken in. Der is ruumte zat, want der woont krap 36.000 mèensen op 30.000 bunder.

De inwoners van Coevern woont in de stad Coevern en in 28 darpen en darpies: Steenwingsmoer, Neie Krim, Zweel, Aalden, Bennenveld, Möppen, Wisp, Wisperbrug, Slien, Noord-Slien, Erm, Achterste Erm, Diphoorn, ’t Haantie, Kibbelveen, De Kiel, Schonerd, Hesseln, Gies, Giesbrogge, Zwindern, Wachtum, Daolen, Daolerveen, Daolerpeel, Stieltjeskenaol, Den Hool en Holsloot.

Wonen

In de gemiente Coevern kuj gloepends schier wonen. Er bint hiel wat verschillende schoelen, van VMBO tot Gymnasium. Der is een theater en der bint een hiele koppel sportverienings. Der bint veul sporthallen en sportvelden, der bint drie boetenzwembaden, en een overdekt zwembad en verscheiden waterplassen zoas “De Huttenheugte” in Daolen, het “Ermerstrand” in Erm en de “Kibbelkoele” bij Slien. Der komt verscheiden mooie woonwieken an.

Vekaansie

In de gemiente Coevern kuj geweldig goed vekaansie holden. Der is in de gemiente genog te beleven; niet allén aj maor ien daggie op bezuuk komt, maor ok aj der langer blieft. Van alle toeristische overnachtingen in hiel Drenthe wordt een kwart in oeze gemiente deurbracht (1,4 miljoen in ’t jaor).

Toeristen slaopt in hotels en op campings, maor de miesten verblieft in de bungalowparken, zoas Center Parcs “De Huttenheugte” B.V. in Daolen en Landal Green Parcs “Aelderholt” in Aalden. Tourist Info helpt je geern aj een goed dak boven de kop zuukt.

In de umgeving van Coevern vin ie rust, ruumte, een mooie natuur, een prachtig landschap, rieke geschiedenis, veul verschillende veurzienings en geweldig goeie meugelijkheden um te varen en te fietsen.

In de stad Coevern stiet het ienige kasteel van Drenthe. Het kasteel weur al veur 1200 bouwd. Het kasteel van vandaag de dag is restaureerd. In het Kasteel kuj trouwen en der wordt allerhaande bijienkomsten en feesten holden. Aj met je boot in de haven van Coevern anlegt, bi’j metien in de olde vestingstad en dat mag best uniek nuumd worden. Wieder is in het Arsenaal in Coevern het ‘Stedelijk Museum Coevorden’’.

Het darp Daolen is deur zien landelijke karakter arg gewild as forensenplaots. Veural in de zommer komt er veul toeristen. Deurdat Plopsa Indoor Coevorn en Center Parcs “De Huttenheugte” der bint, bint in Daolen de mieste overnachtingen van toeristen. In Daolen bint een stuk of wat dinger van ambachtelijke aard het bekieken weerd, zoas bijveurbeeld twie meulens.

Hesseln en Gies bint biezunder, umdat ze zu’n mooi en ofwisselnd landschap hebt met veul bos, veld en vennen. De twie natuurrisservaten “De Hooge Stoep” in Gies en “De Klencke” in Hesseln bint beslist een bezuk weerd. In dizze umgeving staot boetendes prachtig mooie, goed underholden Saksische boerderijen. Van een bezuuk an galerie en beeldentuun “Dehullu” in Gies zuj ok beslist gien spiet kriegen.

Het darp Schonerd is een beste plek veur vekaansie en vrije tied. In Schonerd bint het openluchtmuseum “Ellert en Brammert” en een stuk of wat hunebedden, waorunder “De Papeloze Kerk” het bekieken weerd. As hunebedden en grafheuvels je interesse hebt of aj der meer over weten wilt, bi’j op de juuste stek.

Het darp Slien is ien van de miest authentieke brinkdarpen in Drenthe. Veul toeristen vindt de sfeer, de rust en de schitterende umgeving van het darp alderbarstend plezerig. In Slien bint de NH Kerk (oet de 15e ieuw) en het vroggere gemientehoes de muite van het bekieken weerd.

Zweel is een schildersdarp. Schilders as Max Liebermann en Vincent van Gogh bint in dit darp west um der schilderijen te maken. De natuurgebieden um Zweel hen en het plezerige darp bint belangriek veur daggiesmèensen en veur lu die der langer blieven wilt. De NH Kerk in Zweel oet de 13e ieuw is mooi um ies hen te gaon.

Veurzienings veur oet de wiede umgeving bint under andern Plopsa Indoor Coevorn, de kunstskibaan in Wisperbrug, de openbare negenholes golfbaan van Landal Green Parcs en de achttienholes baan van golfveriening “De Gelpenberg”, allebeide in Aalden en de waterskibaan op het recreatiepark “Ermerstrand” in Erm.

Bedrieven

De warving van neie bedrieven wordt veural deur de gemiente zölf daon. Der bint hiel verschillende bedrieven in Coevern. Veural metaal- en elektrotechnische febrieken en vervoersbedrieven bint der hiel wat. Wieder bint der veul undernemingen, die nauw verbunden bint met de eulie- en gaswinning.

Je kunt goed in Coevern kommen; dat kan over de weg, over ’t water en met de trein. De belangriekste wegen der naortoe bint de A37, N34 en de N381. Aj met de trein van Zwolle hen Emmen gaot, koj in de gemiente an twie stations van de NS langs: Coevern en Daolen. Wieder is Coevern ansleuten op de Duutse spoorwegen van de Bentheimer Eisenbahn. Zo kuj met de trein hiel Europa in.

Aj oet het zuden komt, kuj deur het kenaol Coevern-Almelo in de stad kommen. Deur dat kenaol kunt vandaag de dag schepen van 600 tun. Van het noorden oet kunt deur het Stieltjeskenaol zölfs schepen van 800 tun hen Coevern.